Fact Check| မြစ်သားမြို့ဆန္ဒပြပွဲက သရုပ်ဖော်ပုံတွေကို မြစ်ကြီးနားမှာဖမ်းဆီးခံရတဲ့ဆရာ/ ဆရာမတွေဆိုပြီး မှားယွင်းဖြန့်ဝေနေ
ဟုတ်တယ် Vs မဟုတ်ဘူး ရဲ့ အချက်အလက်စစ်ဆေးသူတွေ အသိပေးချင်တဲ့ သတင်းအမှားအကြောင်းအရာတစ်ခုရှိပါတယ်။ အဲ့တာက မြစ်ကြီးနားမြို့က ဆရာ/ဆရာမတွေကို လက်နောက်ပြန်ကြိုးတုပ်ပြီး ဖမ်းဆီးသွားတယ်ဆိုပြီး ပြန်လည်မျှဝေနေကြတဲ့ ပုံအကြောင်းဖြစ်ပါတယ်။ အဲ့ဒီ အကြောင်းအရာအမှားကို ဖေ့ဘွတ်ခ်ပေါ်မှာ လူပေါင်းများစွာက ပြန်လည်မျှဝေနေတဲ့အတွက် အချက်အလက်စစ်ဆေးပြီး သတင်းအမှားဖြစ်ကြောင်း အသိပေးရခြင်း ဖြစ်ပါတယ်။
ဘာလို့ သတင်းအမှားလို့ပြောရတာလဲဆိုရင်
- ပျံ့နှံ့နေတဲ့ မြစ်ကြီးနားက ဆရာ/ဆရာမတွေကို လက်နောက်ပြန်ကြိုးတုပ်ဖမ်းဆီးသွားတယ်ဆိုတဲ့ပုံကို Crowdtangle Tool နဲ့ ရှာဖွေလိုက်တဲ့အခါမှာတော့ အလားတူပုံစံတူ ဓာတ်ပုံတွေအများကြီး ဖေ့ဘွတ်ခ်မှာ ရှိနေတာတွေ့ပါတယ်။
Crowdtangle Tool နဲ့ရှာဖွေရာမှာ တွေ့ရှိရတဲ့ပုံတချို့
- Crowdtangle Tool ရဲ့ ရှာဖွေခြင်းကနေ ခြေရာခံလိုက်ကြည့်တော့ အဲ့ဒီပုံတွေက တကယ်တော့ မြစ်သားမြို့မှာ ဖေဖော်ဝါရီ ၁၈ ရက်နေ့က ပြုလုပ်ခဲ့တဲ့ ဆန္ဒပြပွဲ အတွင်းတုန်းက သရုပ်ပြပုံတွေဖြစ်ပါတယ်။ မြစ်သားမြို့အခြေစိုက် ဓာတ်ပုံဆရာတစ်ဦးက သူ့ရဲ့ ဖေ့ဘွတ်ခ်အကောင့်မှာ ဖေဖော်ဝါရီ ၁၈ ရက်နေ့က တင်ထားပါတယ်။ ဒီလင့်ခ် မှာ ဝင်ကြည့်နိုင်ပါတယ်။
မြစ်သားမြို့ဆန္ဒပြပွဲမှ ဓာတ်ပုံဖြစ်ကြောင်းသက်သေပြနိုင်သည့် မူရင်းအရင်းအမြစ်
- ဒီပုံတွေဟာ မြစ်ကြီးနားမှာ ဖမ်းဆီးခံရတဲ့ ဆရာ/ဆရာမတွေနဲ့ မသက်ဆိုင်ပဲ သီးခြားဖြစ်ပါတယ်။ မြစ်ကြီးနားမှာ ဖေဖော်ဝါရီ ၁၉ ရက် နံနက်ပိုင်းက အဖမ်းခံရတဲ့ ဆရာ/ဆရာမတွေနဲ့ ပတ်သက်တဲ့ သတင်းကိုတော့ ဒီမှာ ဝင်ရောက်ဖတ်ရှုနိုင်ပါတယ်။
- အထက်မှာဖော်ပြခဲ့တဲ့အချက်အတိုင်း စိစစ်ကြည့်လိုက်မယ်ဆိုရင် မူရင်းအရင်းအမြစ်က မြစ်သားမြို့ ဆန္ဒပြပွဲကပုံတွေ ဖြစ်တယ်ဆိုတာ သိရှိနိုင်ပါတယ်။ ဒါကြောင့် မြစ်ကြီးနားမြို့က ဆရာ/ဆရာမတွေကို လက်နောက်ပြန် ကြိုးတုပ်ဖမ်းဆီးသွားတယ်ဆိုတာက သတင်းအမှားဖြစ်ကြောင်း သက်သေပြနိုင်ပါတယ်။
တပ်မတော်က အာဏာသိမ်းယူလိုက်ပြီးတဲ့နောက်ပိုင်းမှာ အင်တာနက်လူမှုကွန်ရက်စာမျက်နှာတွေပေါ်မှာ သတင်းအမှားတွေ၊ သတင်းအတုတွေ၊ ထုတ်ပြန်ချက် အတုတွေနဲ့ Messenger ကတဆင့် အသံဖိုင်ဖြင့် သတင်းအမှား ဖြန့်ဝေမှုတွေဟာ အများအပြားပျံ့နှံ့လျက်ရှိပါတယ်။ ဟုတ်တယ် vs မဟုတ်ဘူးရဲ့ စာဖတ်ပရိတ်သက်တွေအနေနဲ့ လူမှုကွန်ရက်စာမျက်နှာတွေပေါ်မှာ ပျံ့နှံ့နေတဲ့ သတင်းတိုင်းကို အလွယ်တကူမယုံကြည်ရန် အကြံပြုလိုပါတယ်။ သတင်းတစ်ပုဒ်ကို ဒါမှမဟုတ် အကြောင်းအရာတစ်ခုခုကို တွေ့ရင် သတင်းမီဒီယာ လုပ်ငန်းစဉ်အတိုင်းလုပ်ဆောင်နေတဲ့ သတင်းဌာနတွေမှာ ဖော်ပြထား/မထားနဲ့ တိုက်ဆိုင်စစ် ဆေးကြဖို့ အကြံပေးလိုပါတယ်။
တိုက်ဆိုင်စစ်ဆေးဖို့ အချိန်မရှိရင်လည်း အလွယ်တကူ Share တာတွေမလုပ်ပဲ ဟုတ်တယ် vs မဟုတ်ဘူးရဲ့ Chatbot ကို သတင်းအမှား/အမှန် အရင်ဆုံး လာရောက်မေးမြန်းကြဖို့ တိုက်တွန်းလိုက်ပါတယ်။
ဝေဖန်အကြံပြုရန်
ဟုတ်တယ် Vs မဟုတ်ဘူးမှ စိစစ်ထားသော မည်သည့်သတင်းကိုမဆို ဝေဖန်အကြံပြုလိုပါက အောက်ပါ Form တွင် ဖြည့်စွက်ပြီး ဝေဖန်အကြံပြုနိုင်ပါသည်။ https://www.realornotmm.info/complaint-form/
