Fact Check| သီတဂူဆရာတော် ကိုဗစ်-၁၉ ဖြစ်နေပြီဆိုပြီးဖြန့်တဲ့ သတင်းအမှား

ဟုတ်တယ်Vs မဟုတ်ဘူးရဲ့ အချက်အလက်စစ်ဆေးသူတွေ သတိထားမိလိုက်တဲ့ သတင်းအမှားတစ်ခုကို အားလုံးသိအောင်ပြောပြပေးချင်ပါတယ်။ အဲ့ဒီသတင်းအမှားကတော့ သီတဂူဆရာတော် ဦးဉာဏိဿရ ကိုဗစ်-၁၉ ဖြစ်နေပြီဆို တဲ့သတင်းအမှားအကြောင်းအရာပဲဖြစ်ပါတယ်။

အဲ့ဒီသတင်းအတု/သတင်းအမှား ကို ကလျာ ဆိုတဲ့ အကောင့်က ပဲခူးသတင်းအကုန်သိရန် ဆိုတဲ့ Group မှာ တင်ခဲ့တာဖြစ်ပြီးတော့ အချိန်ခဏအတွင်းမှာ Share လုပ်သူ ၂၀၀ကျော်ကိုရောက်ရှိခဲ့ပြီး ပို့စ်ကိုဖျက်ပြီး ချဲ ဂဏန်းပေးတဲ့ပို့စ်ကိုအစားထိုးပြောင်းလဲလိုက်တာဖြစ်ပါတယ်။

 

 ဘာလို့သတင်းအမှားလို့ပြောရတာလဲဆိုရင် 

 

  • သီတဂူဆရာတော်ကိုဗစ်-၁၉ ဖြစ်တယ်ဆိုရင် မြန်မာနိုင်ငံအခြေစိုက်သတင်းမီဒီယာလုပ်ငန်းစဉ်အတိုင်းဆောင် ရွက်ရေးသားနေတဲ့ သတင်းမီဒီယာတွေမှာဖော်ပြမှာဖြစ်ပါတယ်။သတင်းဌာနတွေမှာ ဒီအကြောင်းကိုသတင်း ဖော်ပြထားတာလုံးဝ မရှိပါဘူး။
  • ဒီသတင်းအမှားမှာ သုံးထားတဲ့ ပုံက လွန်ခဲ့တဲ့နှစ်များစွာက အာရှတော်ဝင်ဆေးရုံမှာ နှလုံးစမ်းသပ်တဲ့စက်အသစ်တပ်ဆင်တုန်းက ပရိတ်သွားရောက်ရွတ်ပေးတဲ့ပုံဖြစ်ပြီး အခုပျံ့နေတဲ့သတင်းက သတင်းအမှားဖြစ်ကြောင်းကို သီတဂူစတားဆရာတော် ဒေါက်တာ ကောဝိဒသီရိက ပြန်လည်ဖြေရှင်းထားပါတယ်။ ဒီမှာ သွားဖတ်နိုင်ပါတယ်။ 
  • သီတဂူ ဝဘ်ဆိုက်ဒ် စာမျက်နှာမှာလည်း သီတဂူဆရာတော် ကိုဗစ်ဖြစ်ပွားနေပြီဆိုတာနဲ့ပတ်သက်ပြီး တစ်စုံတစ်ရာတင်ထားတာမရှိပါဘူး။ ဒီမှာ ဝင်ရောက်ကြည့်ရှုနိုင်ပါတယ်။ 
  • သီတဂူဆရာတော်ကိုယ်တိုင် ဒီမနက်မှာ  စစ်ကိုင်းတောင်၊ သီတဂူဗုဒ္ဓတက္ကသိုလ်၊ သဒ္ဓမ္မဇောတိကာ သိမ်တော်ကြီးမှာ ပြုလုပ်ခဲ့တဲ့ ရဟန်းခံပွဲကို ကိုယ်တိုင်ကြွရောက်ချီးမြှင့်ခဲ့တဲ့  Live Video ကို ဒီမှာ ဝင်ကြည့်နိုင်ပါတယ်။ 

 

အထက်မှာဖော်ပြခဲ့တဲ့အချက်တွေနဲ့ တိုက်ဆိုင်စစ်ဆေးမယ်ဆိုရင် သီတဂူဆရာတော်ကြီး ကိုဗစ် ဖြစ်နေပြီဆိုတဲ့ သတင်းက သတင်းအမှားဖြစ်ကြောင်းကို စိစစ်တွေ့ရှိရမှာဖြစ်ပါတယ်။ 

ကိုဗစ်-၁၉ တကျော့ပြန် ပျံ့နှံ့မှူနဲ့အတူ လူမှုမီဒီယာပေါ်မှာ သတင်းအမှားတွေက နည်းမျိုးစုံနဲ့ပျံ့နှံ့နေတဲ့အတွက် သတင်းတွေကိုဖတ်ရှုရာမှာ သတင်းမှာပါဝင်တဲ့ စာသားတွေအပြင် ဓာတ်ပုံတွေ ၊ဗီဒီယိုတွေကိုပါ စစ်ဆေးပြီး အမှား/အမှန် စိစစ်သင့်ပါတယ်။ အထူးသဖြင့် စိတ်ခံစားမှုကို ပြင်းပြင်းထန်ထန်သက်ရောက်စေနိုင်တဲ့သတင်း တွေ၊ အသံဖိုင်တွေ ဗီဒီယိုတွေကို ပိုပြီးဂရုစိုက်ဖတ်ရှုနားထောင်သင့်တဲ့အကြောင်းလည်း အကြံပြုလိုက်ပါတယ်။ 

တကယ်လို့ သတင်း အမှား/အမှန်ခွဲခြားရခက်နေတယ်ဆိုရင်လည်း ဟုတ်တယ် Vs မဟုတ်ဘူး Facebook page ရဲ့ Messenger botကို ကိုယ်စစ်ဆေးလိုတဲ့ သတင်းရဲ့လင့်ခ်ဒါမှမဟုတ်Screenshotကို ပေးပို့ပြီး မေးမြန်း စိစစ်နိုင်ပါတယ်။

 

ဝေဖန်အကြံပြုရန်

ဟုတ်တယ် Vs မဟုတ်ဘူးမှ စိစစ်ထားသော မည်သည့်သတင်းကိုမဆို ဝေဖန်အကြံပြုလိုပါက အောက်ပါ Form တွင် ဖြည့်စွက်ပြီး ဝေဖန်အကြံပြုနိုင်ပါသည်။ https://www.realornotmm.info/complaint-form/